النرجسي كداااااب : كذاب بداعي وبدون داعي ، وعشان يداري كدبه دايما يقولك انتي اللي بتنسي لحد مايخليكي تصدقي انك بتنسي فتلاقي نفسك بتنسي فعلا فيتخانق معاكي دايما لانك بتنسي ، ممكن متاخديش بالك انه كداب في الاول وخصوصا لو كان نرجسي خفي لانه مش حيكدب في حاجات واضحة ولها اثبات لكن حيكدب في مواقف هايفة مش محتاجة منك تركزي عشان تفتكري هو صح ولا انتي ، زي مثلا الشيءاللي اشتريناه كان ثمنه كذا وانتي عارفة انه مش دة ثمنه وهو حيصر علي رأيه وممكن يرهبك بنظراته او يزعق فانتي تشكي في نفسك وتصدقيه ، او يقول لك معملتيش الحاجة الفلانية ليه من غير مايكون طلبها منك اصلا ولو قلتي لي انت مقلتليش ، حيحلف لك ميت يمين وميت عظيم انه قال لك وانتي مش بتركزي معاه او انتي مبتسمعيش ، او تندهي عليه ميردش نهائي ولو قلتي له مش بترد ليه حيقول لك رديت هو انتي مبتسمعيش ؟ ويبدأ يقنعك انك فعلا مش بتسمعي وعندك مشكلة وممكن يوديكي لدكتور الاذن عشان يزيد وهمك انك مش بتسمعي ، وعشان يزيدك اثبات انك مش بتسمعي لما يحب ينده لك وانتي في المطبخ مثلا ينده بصوت عااااال يوصل لبلد تاني منها يرعبك ومنها يفهمك انك مبتسمعيش ولو سألتيه بتزعق ليه يقولك بنده لك من الصبح بالراحة مش بتردي انتي مبتسمعيش ؟ كل دة بيستخدمه في اسلوب الشعللة ودة حنتكلم فيه في بوست لوحده ، وكمان بيخلق منك شخص جديد معاق مسكين بينسى ومش بيسمع وجبان وكل ماكنتي ضعيفة كل مازادت سيطرته عليكي وزادت طاعتك له وزاد الامداد اللي بياخده منك ، كل دة غير الكدب الواضح بقى اللي لما يخون يكدبه واحيانا في اسلوب الشعللة يكدبه عشان يتهمك بالجنون ، والكدب لما يعوز ياخد منك فلوس ، او ميديكيش فلوس ويحلف انه معهوش .
ادرس عدوك النرجسي.. كوثر سند 